busfahren

das werd äuä ned sone länge post, es goht wörkli oms busfahre ;-) aber es het mi so erstunt, dasi gfonde ha, das chönti jo do häre schriibe.
Emmer am mettwoch ond frittig hani badminton in Stubbekoebing, met em bus esch das e halb stond. geschter hani auso de bus am 16.48 gno, dosse eschs scho stockfiischter gsi ond es het sseeehr fescht grägnet. i be i bus ond zvorderst häreghocket, damet i gse woni mues dröcke zum usstiege. de buschauffeur esch sehr schnäll gfahre, hani gfonde, för dases sones schmals strössli met so vele korve esch ond mer ned wiiter gseht als velech 5m. wenn es outo chonnt mues mer halb is fäld usefahre ond mängisch hets so riese glongge, wos när mega höch sprötzt uf de siite. i has lostig gfonde. :D uf dere strecki fahrt mer ou no chorz am meer verbii ond i ha eifach nome so öppis wiisses gse uflüchte ab ond zue, schuumchrone. d stross esch e einzige see gsi ond i has gfüehl gha de bus schwömmt etz de gad. ide korvene hets jedesmol soo luut giiret dass de buschauffeur dors mikrofon het erklärt dass das nome esch wöus so nass esch, ned das mer gad usenandgheie. seehr beruigend.
wo mer de z stubbekoebing gsi send, beni no die einzig im bus gsi, also het de chauffeur mi gfrogt, wos mer am beste gieng zom usstiege ond het mi diräkt vor de badmintonhalle usegloh, obwohl das ned mol ade busstrecki liit. :-D
bim heifahre beni ou weder di einzig gsi, ond am chauffeur eschs äuä chli langwiilig gsi, är het met mer afo rede, öber reh wo ame ide nacht öberd stross seckle ond i sell ufpasse wöu de brämsi är de, ond dases doch aso wörkli sehr fest rägni ond blablabla...:-) normalerwiis lose si ame seehr luut radio, aber dasch äuä kabott gsi. :-D
jedefalls se di chauffeure do di meiste sehr nätt, ond es esch ou ned so das mer onbedengt ade bushaltestell mues ii ond usstiege, me chas ehm go säge, i wett gärn det ond det use ond de haltet er det, oder wenn öpper am strosserand stoht ond wenkt halte si aube ou. aber dasch halt ou wöud haltestelle fasch nome ide dörfli send, ond de eschs z.T. rächt wiit zum loufe vo dene abglägne hüüser ond buurehöf.

jo das wärs, i mues jetz go luege, was mi zopf macht, ob er ready esch för i ofe. :D
bes gli weder einisch
grüess usem verrägnete dänemark
Lisa